2015年12月1日 星期二

果汁排毒 + 減肥

果汁排毒 / 減肥已經唔係新鮮事,不過近排喺討論區仲見到唔少「絲打」講緊,所以正正經經寫一次我嘅睇法。每個價值數百至一千元不等的「療程」通常維期數日,每日會飲五、六枝果汁,除此之外就唔會再食其他嘢。呢個方法聲稱能夠幫助清除體內毒素,仲有助減肥。係咪真係咁堅?

短期效果

我係健身教練,我最關心嘅都係佢嘅減肥效果。果汁療程的確能夠喺短短幾日令人減磅,原理係由於只飲果汁未能提供足夠能量應付每日身體所需,令身體消耗儲存喺肌肉嘅能量 – 糖原,此舉會令身體流失水份。由於水份嘅密度(Density)較高,體重會隨住水份流失而下降,做成有效減肥嘅錯覺,其實冇咗嗰幾磅只係水,並非脂肪。

長期效果

果汁療程未能提供足夠能量及養份,不能長期使用,所以每次療程大多只係數天。當回復正常飲食,水份得以補充後,體重定必回升。如果完成一個療程後,於「放監」一刻失去理智大吃大喝,隨時得不償失,肥過之前。

營養成份

成年人每日大概需要四、五十克嘅蛋白質,但果汁只有極少量蛋白質。如身體攝取蛋白質不足,除咗對健康有影響外,仲會令寶貴的肌肉流失:身體越多肌肉,消脂速度越快;而且一樽小小的果汁係由多個生果製成,內含不少果糖,多飲對減肥冇益。

排毒減肥?



「果汁排毒減肥」呢個概念真係唔知由幾時開始... 係近幾年先多啲喺減肥廣告同我嘅學生口中聽到。其實身體已經內置排毒功能:腎、肝、腸道係識處理及清除毒素的;而且果汁療程能夠排毒、令消化系統休息(消化系統無端端做乜嘢要休息??)、提升免疫力等亦無科學根據。
---------------------------------------------------------------------------------------------------------------

單人 / 小組健身課程 | 於私人健身室舉辦,有不同日子及類型課堂任你揀。
詳程請登入:http://simplefitness123.blogspot.hk/2000/01/group-training.html